الترام الصفرا دى شئ جميل بجد
مش ذنبها ان الدنيا اتغيرت من حواليها
هى طول عمرها وليها قضيب ماشيه عليه
ومش بتحود لايمين ولا شمال ولا ماشيه بدماغها
فجاة لقيت الدنيا اتزحمت فجاة لقيت شباب هايف بيستغلوها فى المعاكسات والكلام الفارغ
فجأة لقيت العربيات فى وشها و فى ضهرها
الترام الصفرا هى الشئ الوحيد اللى باقى من الذكريات القديمة
حا,ل مرة تركبها وتكون رايق واتفرج على وشوش الناس الغلابه
الطبيعى اننا نحب الناس بلحمهم وشحمهم وبعرقهم وبتعبهم
مش نقول ياى اف ايه ده
بص لسواقين الترماى والكمساريه هتلاقى شخصيات قديمة انتهت من زمان فى تسريحة الشعر والمنظر
ومع كل ده فيها نظام لايخترق ابدا
يعنى مفيش حاجه اسمها حد يركب من قدام او النص
اتحدى ان تجد مواصلة واحده فى مصر الناس بتركب فيها بنظام اتحدى غير الترماى الصفرا
الركوب من الباب الخلفى فقط باستثناء الباب الامامى دى للعواجيز واصحاب الاحتياجات الخاصة
الزحمه دى موجوده فى كل مواصلات الدنيا
وبعدين لما يلغوها الناس اللى محشورة فيها دى تروح فين؟؟؟؟؟
بعد ما الكورنيش اتدمر ببلوكات الاسمنت الملعونة وضاعت كل معالم الصخر اللى نحتها البحر على مر السنين
لازم ندافع عن اخر الحاجات القديمه الجميله الموجوده
على فكرة اليابانين لما شافوا الترام دى وهما اللى عاملينها خدوا منها واحده عشان يحطوها عندهم فى المتحف لانها ما كانوش متخيلين انها لسه شغاله حتى الان
وعلى فكرة الترام موجودة فى كتير من الدول الاوروبيه حتى الان وما اتلغتش ومعتزيين بيها جدا
الترام الصفرا دى زى مصر
بتلم كل الشعب جواها والغلابة والشقيانين
